Home Articles Malayalam Articles Holy Spirit and Baptism in Holy Spirit

Holy Spirit and Baptism in Holy Spirit

50
0

പരിശുദ്ധാത്മാവും പരിശുദ്ധാത്മസ്നാനവും
by പാസ്റ്റർ കെ. ഇ. ഏബ്രഹാം
(പരിശുദ്ധാത്മസ്നാനം എന്ന പുസ്തകത്തിൽ നിന്ന്)

“ഞാന് പോകുന്നത് നിങ്ങള്ക്ക് പ്രയോജനം; ഞാന് പോകാഞ്ഞാല് കാര്യസ്ഥന് നിങ്ങളുടെ അടുക്കല് വരികയില്ല; ഞാന് പോയാല് അവനെ നിങ്ങളുടെ അടുക്കല് അയയ്ക്കും” (യോഹ. 16:7).

മനുഷ്യന് രക്ഷിക്കപ്പെടുന്നതിനു പരിശുദ്ധാത്മാവിന്റെ പ്രവര്ത്തനം അത്യാവശ്യമത്രെ. പിതാവായ ദൈവത്താല് മനുഷ്യന് സൗജന്യമായി നല്കപ്പെട്ടതും, ക്രിസ്തുവിന്റെ പ്രായശ്ചിത്ത ബലിയില് നിവര്ത്തിച്ചിരിക്കുന്നതുമായ രക്ഷയെ മനുഷ്യ ഹൃദയങ്ങളില് അനുഭവമാക്കുന്നത് പരിശുദ്ധാത്മാവിന്റെ വേലയാകുന്നു. ഇങ്ങനെ മനുഷ്യന്നായുള്ള രക്ഷാവേളയില് പിതാവായ ദൈവത്തിനും, പുത്രനായ ദൈവത്തിനും, പരിശുദ്ധാത്മാവായ ദൈവത്തിനും ഒരുപോലെ സ്ഥാനമുള്ളതായിട്ടത്രെ ഇരിക്കുന്നത്. പരിശുദ്ധാത്മാവ് മനുഷ്യഹൃദയങ്ങളില് ദൈവത്തിന്റെ രക്ഷയെ പ്രവേശിപ്പിച്ച് താന്തന്നെ മനുഷ്യന്റെ ശരീരത്തെയും ഹൃദയത്തെയും കൈവശമാക്കി അവന്റെ ഉള്ളില് വസിക്കുന്നു. പരിശുദ്ധാത്മാവ് മനുഷ്യഹൃദയത്തിലേക്ക് വരിക മുഖാന്തിരം ക്രിസ്തുവും ക്രിസ്തുവില് കൂടെ പിതാവായ ദൈവവും അവന്റെ ഉള്ളിലേക്കു കടന്നുവരുന്നു. ഇങ്ങനെ ത്രിയേക ദൈവം മനുഷ്യനില് അധിവസിക്കുന്നതായ അനുഭവത്തെ തുടര്ന്നു വിശ്വാസി പരിശുദ്ധാത്മാവിനാല് നിറയപ്പെട്ടു ത്രിയേക ദൈവത്തിന്റെ നിറവില് വസിക്കാന് കഴിയുന്ന ഒരു വിശിഷ്ടാനുഭവം മനുഷ്യനായി നിക്ഷേപിച്ചിട്ടുണ്ട്. ആ ദിവ്യാനുഗ്രഹത്തെക്കുറിച്ചത്രെ ചുവടെ വിവരിക്കുന്നത്.

മശിഹായുടെ വരവിനെക്കുറിച്ച് പ്രവാചകന്മാര് പല പ്രാവശ്യം പ്രവചിച്ചിരുന്നവണ്ണം തന്നെ പരിശുദ്ധാത്മാവിന്റെ ആഗമനത്തെക്കുറിച്ചും അനേക പ്രാവശ്യം പ്രവചിച്ചിരിക്കുന്നതായി പഴയനിയമ ഗ്രന്ഥം പാരായണം ചെയ്താല് ഗ്രഹിക്കാവുന്നതാണ്. പരിശുദ്ധാത്മാവ് പിതാവിനോടും പുത്രനോടും സമനായി ത്രിത്വത്തില് മൂന്നാമനായ ഒരു ആള് അത്രേ. തനിക്ക് ഒരു ആളത്വം (ജലൃീെിമഹശ്യേ) ഉണ്ട്. പരിശുദ്ധാത്മാവ് ഒരു ശക്തി മാത്രമെന്ന് ഉപദേശിക്കുന്നവര് ഇക്കാലത്ത് ഇല്ലാതില്ല. എന്നാല് ദൈവത്തിന്റെ വചനത്തില് താന് ആളത്വമുള്ളവനെന്ന് വ്യക്തമാക്കിയിരിക്കുന്നു. ക്രിസ്തു തന്റെ ശിഷ്യന്മാരോട് പരിശുദ്ധാത്മാവിനെപ്പറ്റി സംസാരിക്കുന്നതില് കാര്യസ്ഥന്, ആശ്വാസപ്രദന്, അവന്, ഇത്യാദി പദങ്ങള് ഉപയോഗിച്ചിരിക്കുന്നത് പരിശുദ്ധാത്മാവ് ആളത്വം ഉള്ളവനാകയാലത്രെ. അവന് ഒരു ശക്തിയല്ല; പ്രത്യുത ശക്തിയോടുകൂടിയ ഒരു ആള് (ദൈവം) ആകുന്നു. അതു നിമിത്തമാണ് തന്നെക്കുറിച്ച് ഉയരത്തിലെ ശക്തി എന്ന് എഴുതിയിരിക്കുന്നത്. പരിശുദ്ധാത്മാവ് ഒരു ശക്തിമാത്രമായിരുന്നെങ്കില് തനിക്ക് പ്രാവുപോലെ ഇറങ്ങി വരാന് ഒരിക്കലും സാധിക്കയില്ലായിരുന്നു. കൂടാതെ, പരിശുദ്ധാത്മാവ് മനുഷ്യരില് പ്രവേശിച്ച് താന്തന്നെ സംസാരിക്കുന്നതും ഒരു ആള് ആകയാലത്രെ. അതിനാല് പരിശുദ്ധാത്മാവ് ഒരു ശക്തി മാത്രമാണെന്നുള്ള ഉപദേശം വെറും നിരര്ത്ഥകമെന്നും, സത്യവചനത്തിനു വിരുദ്ധമായതെന്നും മനസ്സിലാക്കണം.

പഴയനിയമകാലത്ത് പരിശുദ്ധാത്മാവ് വിശ്വാസികളോടുകൂടെ വസിച്ചിരുന്നതേയുള്ളൂ. എന്നാല് പുതിയനിയമ കാലത്താകട്ടെ, താന് അവരുടെ ഉള്ളില് വസിക്കുമെന്നാണ് കാണുന്നത്. വിശ്വാസികളുടെ ഹൃദയങ്ങളില് വസിപ്പാനായി താന് അയയ്ക്കപ്പെടുമെന്നുള്ളതു കൊണ്ട് ‘പിതാവിന് വാഗ്ദത്തം’ ‘വാഗ്ദത്തത്തിന് പരിശുദ്ധാത്മാവ്’ എന്നിത്യാദി പേരുകള് പുതിയ നിയമത്തില് കാണുന്നുണ്ട്. തന്റെ വരവിനെക്കുറിച്ച് പ്രവാചകന്മാര് ധാരാളമായി സംസാരിച്ചിരുന്നു. ‘ഞാന് അവര്ക്ക് വേറൊറു ഹൃദയത്തെ നല്കുകയും, പുതിയൊരു ആത്മാവിനെ ഉള്ളില് ആക്കുകയും ചെയ്യും’ (യെഹെ. 11:19). ‘പുതിയൊരു ആത്മാവിനെ ഞാന് നിങ്ങളുടെ ഉള്ളില് ആക്കും’ (യെഹെ. 36:26). ‘നിങ്ങള് ജീവിക്കേണ്ടതിനു ഞാന് എന്റെ ആത്മാവിനെ നിങ്ങളില് ആക്കും’ (യെഹെ. 37:14). ‘നിന്റെ സന്തതിമേല് എന്റെ ആത്മാവിനെയും നിന്റെ സന്താനത്തിന്മേല് എന്റെ അനുഗ്രഹത്തെയും പകരും’ (യെശ. 44:3). ‘ഞാന് സകല ജഡത്തിന്മേലും എന്റെ ആത്മാവിനെ പകരും’ (യോവേ. 2:28).

ഈ വചനങ്ങളില് പ്രകാരം പരിശുദ്ധാത്മാവ് അയയ്ക്കപ്പെടുകയെന്നത് ക്രിസ്തു കഷ്ടമനുഭവിച്ചു മരിച്ചു അടയ്ക്കപ്പെട്ടു ഉയിര്ത്തു തേജസ്ക്കരിക്കപ്പെട്ട ശേഷമേ നിവര്ത്തിക്കപ്പെട്ടുള്ളൂ (യോഹ. 7:39). യേശു തേജസ്ക്കരിക്കപ്പെട്ടു സ്വര്ഗ്ഗാധിസ്വര്ഗ്ഗത്തില് മഹിമയുടെവലതുഭാഗത്ത് ആരോഹണം ചെയ്തിട്ട് താന് പിതാവിനോടു വാങ്ങി പരിശുദ്ധാത്മാവിനെ പകര്ന്നു (യോഹ. 14:16). അതിനെക്കുറിച്ച് തിരുവചനത്തില് ഇവ്വണ്ണം വായിക്കുന്നു: ‘അവന് ഉയരത്തില് കയറി മനുഷ്യര്ക്ക് ദാനങ്ങളെ കൊടുത്തു’ (എഫേ. 4:8). രാജാക്കന്മാരോ രാജ്ഞിമാരോ സ്ഥാനാഭിഷേകം ചെയ്യപ്പെട്ടു സിംഹാസനാരൂഢരാകുമ്പോള് പ്രജകള്ക്ക് ദാനങ്ങള് കൊടുക്കുന്ന രീതി പുരാതന കാലങ്ങളില് തുടങ്ങി നടന്നു വരുന്നതാണല്ലോ. അഹശ്വെരോശു രാജാവ് എസ്ഥേറിനെ തന്റെ പട്ടമഹിഷിയായി സ്വീകരിച്ച് അവളുടെ തലയില് രാജകിരീടം വച്ച് രാജ്ഞിസ്ഥാനത്തേക്ക് ഉയര്ത്തിയപ്പോള് രാജപദവിക്കൊത്തവണ്ണം സമ്മാനങ്ങളും കൊടുത്തു (എസ്ഥേ. 2:18) എന്ന് കാണുന്നത് ഇതിനൊരു തെളിവത്രെ. അവ്വണ്ണം നമ്മുടെ കര്ത്താവായ ക്രിസ്തുവും ചെയ്തിരിക്കുന്നു. താന് ഉയിര്ത്തെഴുന്നേറ്റ് ആരോഹണം ചെയ്തപ്പോള് പിതാവായ ദൈവം ‘സ്വര്ഗ്ഗത്തില് തന്റെ വലതുഭാഗത്ത് എല്ലാ വാഴ്ചയ്ക്കും അധികാരത്തിനും ശക്തിക്കും കര്ത്തൃത്വത്തിനും, ഈ ലോകത്തില് മാത്രമല്ല വരുവാനുള്ളതിലും വിളിക്കപ്പെടുന്ന സകല നാമത്തിനും അത്യന്തം മീതെ ഇരുത്തുകയും സര്വ്വവും അവന്റെ കാല്ക്കീഴിലാക്കി വെച്ചു അവനെ സര്വ്വത്തിനും മീതെ തലയാക്കി’ (എഫേ. 1:20-22) ഉയര്ത്തുകയും ചെയ്തപ്പോള് അവന് മനുഷ്യര്ക്ക് ദാനങ്ങളെ കൊടുത്തു. ഈ ദാനം വാഗ്ദത്തത്തിന് പരിശുദ്ധാത്മാവാണെന്നത്രെ തിരുവചവനം പറയുന്നത്. ‘അവന് ദൈവത്തിന്റെ വലതുഭാഗത്തേക്ക് ആരോഹണം ചെയത് പരിശുദ്ധാത്മാവാകുന്ന വാഗ്ദത്തം പിതാവിനോടു വാങ്ങി ……… പകര്ന്നു തന്നു’ (പ്രവൃ. 2:33) എന്നും, ‘പരിശുദ്ധാത്മാവാകുന്ന ദാനം’ (പ്രവൃ. 2:38, 10:46) എന്നും നാം വായിക്കുന്നു. അതേ, കര്ത്താവ് ഉയരത്തില് കയറി തന്റെ പിതാവിനോട് ചോദിച്ച് വാഗ്ദത്തം ചെയ്യപ്പെട്ട പരിശുദ്ധാത്മാവിനെ വാങ്ങി മനുഷ്യര്ക്ക് ദാനമായി പെന്തക്കോസ്തു ദിവസത്തില് ഭൂമിയിലേക്കു അയയ്ക്കുകയാല് അന്നു മുതല് പരിശുദ്ധാത്മാവ് മനുഷ്യ ഹൃദയത്തിലേക്കു പ്രവേശിച്ച് അതിനെ നിറച്ചുകൊണ്ടിരിക്കുന്നു.

ഇതിനെ വേറൊരു രൂപത്തില് പരിശുദ്ധാത്മസ്നാനം എന്ന് പറയുന്നു. ഇത് അലങ്കാര ഭാഷയില് പറയുന്നതത്രേ. പരിശുദ്ധാത്മാവിന്റെ വരവിനെക്കുറിച്ച് പ്രവാചകന്മാര് അലങ്കാര ഭാഷയില് പ്രവചിച്ചിട്ടുണ്ട്. കാറ്റ്, എണ്ണ, ജലം ആദിയായവയെ സാമ്യപ്പെടുത്തി അവര് ഈ സംഗതി പ്രസ്താവിച്ചു. പരിശുദ്ധാത്മസ്നാനം എന്ന പദം ജലത്തോട് സാമ്യപ്പെടുത്തിയുള്ള അലങ്കാര പ്രയോഗമത്രെ. പരിശുദ്ധാത്മാവിനെ എണ്ണയോടു സാമ്യപ്പെടുത്തി പറയുമ്പോള് ഏതദ്വിഷയത്തെക്കുറിച്ചു ഉപയോഗിക്കാറുള്ള പദം പരിശുദ്ധാത്മാഭിഷേകം എന്നാകുന്നു. വിശ്വാസികളുടെമേല് പരിശുദ്ധാത്മാവിനെ പകരുന്നതിനെപ്പറ്റി തിരുവെഴുത്തില് ജലത്തോടു ഘടിപ്പിച്ച് ‘മഴ’ എന്ന് ഉപയോഗിച്ചിട്ടുണ്ട്. പരിശുദ്ധാത്മപ്പകര്ച്ച, പരിശുദ്ധാത്മാഭിഷേകം, പരിശുദ്ധാത്മസ്നാനം ഇത്യാദി പദങ്ങളെല്ലാം ഈ അനുഭവത്തെക്കുറിച്ചുള്ള വിവിധ പദങ്ങളാകുന്നു. അതില് ജലത്തോട് സാമ്യപ്പെടുത്തിയുള്ളത് ഇവിടെ ചിന്തിക്കാം. വിശ്വാസികള് ദൈവാത്മാവിന്റെ നിറവ് പ്രാപിക്കുന്നതിനേയും അവരില് നിന്ന് ആ ദിവ്യനിറവിന്റെ വല്ലഭത്വം പുറത്തേക്ക് വ്യാപരിക്കുന്നതിനേയും കുറിച്ച് ‘ജീവജലനദി ഒഴുകുന്നതായി’ പ്രവാചകന്മാര് സംസാരിക്കുകയുണ്ടായി. ‘ഒരു നദി ഉണ്ട്, അതിന്റെ തോടുകള് ദൈവനഗരത്തെ അത്യുന്നതന്റെ വിശുദ്ധ നിവാസത്തെ സന്തോഷിപ്പിക്കുന്നു’ (സങ്കീ. 46:4). ‘യഹോവയുടെ ആലയത്തില് നിന്ന് ഒരു നദി പുറപ്പെട്ട് ശിത്തീം താഴ്വരയെ നനയ്ക്കും’ (യോവേ. 3:18). ‘ദാഹിച്ചിരിക്കുന്നേടത്തു ഞാന് വെള്ളവും വരണ്ട നിലത്തു നീരൊഴുക്കുകളും പകരും’ (യെശ. 44:3). ‘അന്നാളില് ജീവനുള്ള വെള്ളം യെരുശലേമില് നിന്ന് പുറപ്പെട്ട് പാതി കിഴക്കേ കടലിലേക്കും പാതി പടിഞ്ഞാറേ കടലിലേക്കും ഒഴുകും’ (സെഖ. 14:8). ‘അവന് എന്നെ ആലയത്തിന്റെ പ്രവേശനത്തിങ്കല് മടക്കിക്കൊണ്ടു വന്നപ്പോള് ആലയത്തിന്റെ ഉമ്മറപ്പടിയുടെ കീഴെ നിന്നു വെള്ളം കിഴക്കോട്ടു പുറപ്പെടുന്നതു ഞാന് കണ്ടു….. ആ വെള്ളം ആലയത്തിന്റെ വലതു ഭാഗത്ത് കീഴെനിന്നു തെക്കുവശമായി ഒഴുകി… നദീതീരത്തു അക്കരെയും ഇക്കരെയും അനവധി വൃക്ഷം നില്ക്കുന്നത് ഞാന് കണ്ടു… ഈ നദി ചെന്നുചേരുന്നേടത്തൊക്കെയും ചലിക്കുന്ന സകല പ്രാണികളും ജീവിക്കും…. നദീതീരത്തു ഇക്കരെയും അക്കരെയും തിന്മാന് തക്ക ഫലമുള്ള സകലവിധ വൃക്ഷങ്ങളും വളരും; അവയുടെ ഇല വാടുകയില്ല, ഫലം ഇല്ലാതെ പോകയുമില്ല; അതിലെ വെള്ളം വിശുദ്ധ മന്ദിരത്തില് നിന്ന് ഒഴുകി വരുന്നതുകൊണ്ട് അവ മാസംതോറും പുതിയ ഫലം കായ്ക്കും’ (യെഹെ. 47:1-12). പഴയ നിയമത്തില് അലങ്കാര ഭാഷയില് പറയപ്പെട്ടിരിക്കുന്ന ഈ പ്രവചനങ്ങളെ ഇതുപോലെ അലങ്കാര ഭാഷാ പ്രയോഗത്തില് പുതിയ നിയമത്തില് പ്രസ്താവിച്ചിട്ട് അത് പരിശുദ്ധാത്മാവിനെ കുറിക്കുന്നതെന്ന് വെളിവാക്കിയിരിക്കുന്നു. കര്ത്താവായ യേശു ഇതിനെക്കുറിച്ച് ഒരിക്കല് ഇപ്രകാരം അരുളിച്ചെയ്തതായി നാം വായിക്കുന്നു: ‘ഉത്സവത്തിന്റെ മഹാദിനമായ ഒടുക്കത്തെ നാളില് യേശു നിന്നുകൊണ്ട് ദാഹിക്കുന്നവനെല്ലാം എന്റെ അടുക്കല് വന്നു കുടിക്കട്ടെ. എന്നില് വിശ്വസിക്കുന്നവന്റെ ഉള്ളില് നിന്ന് തിരുവെഴുത്ത് പറയുന്നതുപോലെ ജീവജലത്തിന്റെ നദികള് ഒഴുകും എന്ന് വിളിച്ചു പറഞ്ഞു. അവന് ഇത് തന്നില് വിശ്വസിക്കുന്നവര്ക്ക് ലഭിപ്പാനുള്ള ആത്മാവിനെക്കുറിച്ച് ആകുന്നു പറഞ്ഞത്’ (യോഹ. 7:37). ആത്മാവിനെ ജലത്തോട് സാമ്യപ്പെടുത്തിയുള്ള പരിശുദ്ധാത്മസ്നാനം എന്നത് ജലസ്നാനം പോലെ മുഴുകലാണെന്ന് തിരുവെഴുത്ത് സ്പഷ്ടമാക്കിയിട്ടുണ്ട്. ജലസ്നാനം നടത്തിയ യോഹന്നാന് ഇപ്രകാരം പ്രസ്താവിച്ചിരിക്കുന്നു: ‘ഞാന് നിങ്ങളെ വെള്ളത്തില് സ്നാനം കഴിപ്പിക്കുന്നു; അവനോ നിങ്ങളെ പരിശുദ്ധാത്മാവില് സ്നാനം കഴിപ്പിക്കും’ (മര്ക്കോ. 1:8). യോഹന്നാന് ഏതു പ്രകാരം യോര്ദ്ദാന് നദിയില് മുക്കി സ്നാനപ്പെടുത്തിയോ അപ്രകാരം ക്രിസ്തു ആത്മസ്നാനാര്ത്ഥികളെ ജീവജല നദിയില് മുക്കി സ്നാനപ്പെടുത്തുമെന്ന് ഈ പ്രസ്താവന വ്യക്തമാക്കുന്നു. നമ്മുടെ കര്ത്താവും പുനരുത്ഥാനാനന്തരം ശിഷ്യന്മാരോട് ഇപ്രകാരം പ്രസ്താവിച്ചു: ‘യോഹന്നാന് വെള്ളം കൊണ്ട് സ്നാനം കഴിപ്പിച്ചു; നിങ്ങള്ക്കോ ഇനി ഏറെനാള് കഴിയും മുമ്പെ പരിശുദ്ധാത്മാവു കൊണ്ട് സ്നാനം ലഭിക്കും’ (അ.പ്ര. 3:5). യോഹന്നാന് യോര്ദ്ദാനില് സ്നാനം കഴിപ്പിച്ച പ്രകാരം പരിശുദ്ധാത്മാവാം ജീവനദിയില് അവര് സ്നാനപ്പെടുമെന്നത്രെ കര്ത്താവ് അവരോട് പ്രസ്താവിച്ചത്. സ്നാപകനായ യോഹന്നാന് ആളുകളെ സ്നാനപ്പെടുത്തിയത് വെള്ളത്തില് നിമജ്ഞിച്ചായിരുന്നുവെന്ന് നാം അറിയുന്നു. അതുപോലെ ആത്മസ്നാപകനായ കര്ത്താവ് ജീവനദിയില് ആത്മസ്നാനാര്ത്ഥികളെ മുഴുക്കുമെന്നു താല്പര്യം. വെള്ളത്തിലുള്ള സ്നാനം ക്രിസ്തുവിന്റെ മരണ പുനരുത്ഥാനങ്ങള്ക്ക് നിദര്ശനമാകയാല് സ്നാപകന് സ്നാനാര്ത്ഥിയെ വെള്ളത്തില് നിമജ്ജിച്ചിട്ടു മുകളിലേക്ക് ഉയര്ത്തുന്നു. എന്നാല് ആത്മസ്നാനത്തില് ക്രിസ്തു തന്റെ വിശ്വാസിയെ ആത്മനദിയില് നിമജ്ജിച്ചിട്ടു അവനെ അതില് നിന്ന് വെളിയിലേക്ക് വരുത്തുന്നില്ല. ആത്മാവാം ജീവജലത്തില് അവന് മുഴുകിയിരിക്കുകയാണ്. അക്ഷരിക ജലത്തില് ഒരാള് നിമജ്ജിക്കപ്പെട്ട് അവിടെത്തന്നെ കഴിച്ചുകൂട്ടിയാല് സ്വാഭാവികമായി സംഭവിക്കുന്നത് ജലം കുടിച്ചു പോകുക എന്നുള്ളതാണ്. അവ്വണ്ണം ആത്മനദിയില് നിമജ്ജിക്കപ്പെട്ട ദൈവപൈതല് ആത്മാവിനെ പാനം ചെയ്യുക തന്നെ ചെയ്യുന്നു. പ്രകൃതിയിലെ വെള്ളത്തില് മുങ്ങി അതില് നിന്ന് ധാരാളം കുടിച്ചു പോയാല് മരണമാണ് അനുഭവം. എന്നാല് ഇത് ജീവജലമാകയാല് മരിക്കയില്ല. പ്രത്യുത സമൃദ്ധിയായ ജീവന് ലഭിക്കുകയാണുണ്ടാവുക.

ജലം ഒരു പാത്രത്തില് നിറഞ്ഞു കഴിഞ്ഞാല് പിന്നീട് അത് കവിഞ്ഞ് പുറത്തേക്ക് ഒഴുകുക എന്നത് യഥാര്ത്ഥം തന്നെയാണല്ലോ. പരിശുദ്ധാത്മാവാകുന്ന ജീവജലത്തിനു വേണ്ടി ദാഹിക്കുന്ന ഒരുവന് ക്രിസ്തുവിന്റെ അടുക്കല് ചെല്ലുമ്പോള് താന് അവനെ ആ ജീവജലത്തില് സ്നാനപ്പെടുത്തുന്നു. ആത്മാവാകുന്ന വെള്ളത്തില് മുങ്ങിക്കഴിയുമ്പോള് തന്നെ അവന് ആത്മാവിനെ കുടിക്കയും അങ്ങനെ ആത്മാവാകുന്ന വെള്ളത്താല് അവന്റെ ഹൃദയം നിറയപ്പെട്ടിട്ട് അവന്റെ ഉള്ളില് നിന്ന് ഈ ജീവജലം പുറത്തേക്ക് ഒഴുകുകയും ചെയ്യുന്നു. ഇങ്ങനെ പരിശുദ്ധാത്മാവില് സ്നാനപ്പെടുക, പരിശുദ്ധാത്മാവിനെ കുടിച്ചു നിറയപ്പെടുക, പരിശുദ്ധാത്മാവ് കവിഞ്ഞൊഴുകുക ഈ മൂന്നനുഭവങ്ങള് ഒന്നായി നടക്കുന്നതായിട്ടാണ് നാം കാണുന്നത്. പരിശുദ്ധാത്മസ്നാനം എന്ന ഏക പദത്തില് ഈ മൂന്നു സംഗതികളും അന്തര്ഭവിച്ചിട്ടുണ്ട്. അതിനാല് ഈ മൂന്നു കാര്യങ്ങളെ അടിസ്ഥാനമാക്കിയായിരിക്കണം തുടരെയുള്ള അദ്ധ്യായങ്ങളിലെ നമ്മുടെ ആലോചനകള് കൊണ്ടുപോകുന്നത്.

ആത്മസ്നാനം ആത്മാവില് മുഴുകുകയാണെങ്കില് ‘ആത്മാവിനെ പകരും’ എന്ന പദപ്രയോഗം എങ്ങനെ യോജിക്കും എന്നൊരു സന്ദേഹത്തിനു ഇവിടെ വഴിയുണ്ട്. ആത്മാവിനെ പകരും എന്ന പദപ്രയോഗം ആത്മവര്ഷണത്തെ (മഴയെ) സൂചിപ്പിക്കുന്നതത്രെ. ഒരാളിന്റെ മേല് ആത്മമഴ പകര്ന്നിട്ട് ആത്മജലത്താല് അവിടം നിറയപ്പെട്ട് അങ്ങനെ ആ ആള് അതില് മുഴുകുന്നു എന്നര്ത്ഥം. പെന്തെക്കോസ്തു ദിവസത്തില് മാളികമുറിയില് ആത്മജലം പകര്ന്ന് ആ വീടുമുഴുവന് നിറയപ്പെട്ടതിനാല് (അ.പ്ര. 2:2) നൂറ്റിരുപതു പേരും അതില് മുഴുകുകതന്നെ ചെയ്തുവെന്ന് ഇതിനാല് വ്യക്തമത്രെ. അങ്ങനെ അവര് ആത്മനദിയില് മുഴുകപ്പെടുകയും തന്നിമിത്തം അവര് ആ ജീവജലം പാനംചെയ്ത് നിറയപ്പെടുകയും അത് അവരില് നിന്ന് പുറത്തേക്ക് ഒഴുകുകയുമാണുണ്ടായത് (അ.പ്ര 2:4). ജീവജലത്തെ സാമ്യപ്പെടുത്തിയുള്ളതായി മേല് വായിച്ച പഴയനിയമ പ്രവചനങ്ങളില്, ദൈവത്തിന്റെ ആലയത്തില് നിന്ന് ജീവജലനദി പുറപ്പെട്ടു ഒഴുകുന്നതായിട്ടല്ലേ പറയപ്പെട്ടിരിക്കുന്നത്? സ്വര്ഗ്ഗത്തില് ദൈവത്തിന്റെ ആലയത്തിലെ സിംഹാസനത്തില്, ദൈവത്തിന്റെയും കുഞ്ഞാടിന്റെയും ഏക സിംഹാസനത്തില് നിന്ന് പളുങ്കുപോലെ ശുഭ്രമായ ജീവജലനദി പുറപ്പെടുന്നു. ഇത് പെന്തക്കോസ്തു ദിവസത്തില് ആണ് നിവര്ത്തിക്കപ്പെട്ടത്. ദൈവത്തിന്റെ സിംഹാസനത്തില് വലതു ഭാഗത്തായി യേശു ആരൂഢനായപ്പോള് ആത്മാവാകുന്ന ഈ നദി അവിടെനിന്ന് പുറപ്പെടുകയുണ്ടായി. അന്നുമുതല് ഈ നദി ലോകത്തില് ഒഴുകുന്നതിനാല് വിശ്വാസികള് ഈ നദിയില് സ്നാനപ്പെടുത്തുകയും തന്മൂലം അവര് അതില് നിന്ന് കുടിച്ചു നിറയപ്പെടുകയും ചെയ്യുന്നുണ്ട്. ഒരുവന്റെ ഹൃദയം പരിശുദ്ധാത്മാവിനാല് നിറയപ്പെട്ടാലുടനെ ക്രിസ്തുവും പിതാവായ ദൈവവും അവന്റെ ഹൃദയത്തില് തങ്ങളുടെ സിംഹാസനം സ്ഥാപിക്കുന്നു. അപ്പോള് ‘ഞങ്ങള് അവന്റെ അടുക്കല് ചെന്ന് അവനോടുകൂടെ വാസം ചെയ്യും’ (യോഹ. 14:23) എന്നു യേശു പറഞ്ഞ വചനം നിവര്ത്തിക്കപ്പെടും. ഇങ്ങനെ വിശ്വാസിയുടെ ഹൃദയം ദൈവത്തിന്റെ ആലയമായി തീര്ന്നു. ദൈവത്തിന്റെയും കുഞ്ഞാടിന്റെയും സിംഹാസനം അതില് സ്ഥാപിക്കപ്പെടുമ്പോള് ആ ആലയത്തിലെ സിംഹാസത്തിന് കീഴില് നിന്ന് ആത്മാവാകുന്ന ജീവജലനദി പുറത്തേക്ക് ഒഴുകിത്തുടങ്ങുന്നു. ഹാ! ആത്മാവില് സ്നാനപ്പെടുക, ആത്മാവിനെ കുടിക്കുക, അത് കവിഞ്ഞൊഴുകുക എന്നത് – അതേ, പരിശുദ്ധാത്മ സ്നാനം എന്നത് – എത്രയോ മഹത്തായ ഒരനുഭവം! എന്നാല് വിശ്വാസികളില് പലരും വീണ്ടും ജനനം പരിശുദ്ധാത്മസ്നാനം ഇവരണ്ടും ഒന്നുതന്നെയെന്നു ധരിച്ചിരിക്കുകയാണ്. വീണ്ടും ജനനും പരിശുദ്ധാത്മാവിന്റെ ഒരു പ്രവര്ത്തി തന്നെയെങ്കിലും അത് പരിശുദ്ധാത്മ സ്നാനമാകുന്നില്ല. ചിലപ്പോള് വീണ്ടും ജനനം, പരിശുദ്ധാത്മസ്നാനം ഇവ രണ്ടും ഒരേ അവസരം നടന്നിരിക്കാമെങ്കിലും ഇവ രണ്ടും രണ്ടനുഭവം തന്നെയാണ്. ആത്മാവില് നിന്ന് ജനിക്കാതെ ഒരുവനും ഒരു ശിഷ്യനാകുവാന് കഴികയില്ല; ദൈവത്തിന്റെ ആത്മാവിനെ കൂടാതെ ഒരുവനും യേശുവിനെ കര്ത്താവ് എന്ന് സാക്ഷാത്തായി ഏറ്റുപറയുവാനും കഴികയില്ല; ദൈവത്തിന്റെ ആത്മാവിനെ കൂടാതെ ഒരു മാനസാന്തരം ഉണ്ടാകുന്നുമില്ല. എങ്കിലും ആത്മാവില് നിന്നും ജനിക്ക എന്നതും ആത്മാവിനാല് നിറയപ്പെടുക എന്നതും രണ്ട് അനുഭവമത്രെ. അപ്പോസ്തലന്മാര് തുടങ്ങിയുള്ള ശിഷ്യന്മാര് പെന്തക്കോസ്തു ദിവസത്തിന് മുമ്പുതന്നെ ആത്മാവില് ജനിച്ചിരുന്നു. എന്നാല് അപ്പോള് അവര് ആത്മാവിന്റെ സ്നാനം അഥവാ അഭിഷേകം പ്രാപിച്ചിരുന്നില്ല. പിന്നീട് അവര് ഈ നിറവിങ്കലേക്ക് നടത്തപ്പെടുകയാണുണ്ടായത്. അവ്വണ്ണം തന്നെ, ഫിലിപ്പോസ് എന്ന സുവിശേഷകന് ശമര്യയില് ചെന്ന് വചനം പ്രസംഗിച്ചപ്പോള് ഒരു കൂട്ടം ജനം വിശ്വസിച്ചതായി കാണുന്നു (പ്രവൃ. 8). അവര് ആത്മാവില് നിന്ന് ജനിച്ചിരുന്നവര് തന്നെയാണല്ലോ. എന്നാല് അവരെ പരിശുദ്ധാത്മ സ്നാനത്തിലേക്ക് പ്രവേശിപ്പിക്കേണ്ടതിനായി പത്രോസും യോഹന്നാനും ഇറങ്ങിച്ചെന്ന് അവര്ക്കായി പ്രാര്ത്ഥിച്ചപ്പോള് അവര് ആത്മസ്നാനം പ്രാപിച്ചവരായിത്തീര്ന്നു. ഈ സംഗതികളാല്, ആത്മാവില് നിന്ന് ജനിക്ക എന്നതും ആത്മാവില് സ്നാനപ്പെടുക എന്നതും രണ്ടനുഭവമെന്ന് വ്യക്തമത്രെ.

വേറെ ചിലരുടെ ധാരണ ജലസ്നാനത്തിങ്കല് വച്ചുതന്നെ ആത്മസ്നാനവും ലഭിക്കുന്നതായിട്ടാണ്. ഇതിന് അവര്ക്കുള്ള ആധാരവാക്യം താഴെക്കാണുന്നതാകുന്നു:
‘നിങ്ങള് മാനസാന്തരപ്പെട്ടു നിങ്ങളുടെ പാപങ്ങളുടെ മോചനത്തിനായി ഓരോരുത്തര് യേശുക്രിസ്തുവിന്റെ നാമത്തില് സ്നാനം ഏല്പീന്; എന്നാല് പരിശുദ്ധാത്മാവെന്ന ദാനം ലഭിക്കും’ (പ്രവൃ.2:38). ഇതില് സ്നാനം ഏല്പീന് എന്നാല് ആത്മദാനം ലഭിക്കും എന്ന് കാണുന്നതിനാല് സ്നാനം ഏല്ക്കുമ്പോള് തന്നെ ആത്മദാനം ലഭിക്കുന്നതായിട്ടത്രെ ധരിച്ചിരിക്കുന്നത്. എന്നാല് മാനസാന്തരപ്പെട്ട് സ്നാനം ഏറ്റാല് ആത്മദാനം ലഭിക്കത്തക്ക യോഗ്യത ഉണ്ടാകുന്നതിനാല് അതിനെത്തുടര്ന്ന് അത് ലഭിക്കുമെന്നല്ലാതെ സ്നാനകര്മ്മത്തിങ്കല് ആത്മദാനം ഉള്പ്പെട്ടിട്ടില്ല. പക്ഷേ, സ്നാനപ്പെടുന്ന അവസരം തന്നെ ആത്മസ്നാനം ലഭിച്ചുവെന്ന് വരാവുന്നതാണ്. എന്നാല് ആത്മാസ്നാനം എന്നത് ജലസ്നാനത്തില് ഉള്പ്പെട്ടിരിക്കുന്നില്ലായെന്നു മനസ്സിലാക്കണം. പെന്തക്കോസ്തുനാളില് ആത്മസ്നാനം പ്രാപിച്ച ശിഷ്യഗണം, യോഹന്നാന്റെ സ്നാനം കൈക്കൊണ്ടിരുന്നു (പ്രവൃ. 1:21). എങ്കിലും പിന്നീടവര് ആത്മസ്നാനം പ്രാപിക്കയുണ്ടായി. മാത്രമല്ല, ഫിലിപ്പോസിന്റെ പ്രസംഗത്താല് ശമര്യയില് വിശ്വസിച്ച ജനം ജലസ്നാനം ഏറ്റിരുന്നതായി കാണുന്നുണ്ട് (പ്രവൃ. 8:12). എങ്കിലും അവര്ക്ക് പിന്നാലെ ആത്മസ്നാനം ലഭിച്ചതായിട്ടാണ് പറയപ്പെട്ടിരിക്കുന്നത്. അതിനെക്കുറിച്ച് നാം ഇവ്വണ്ണം വായിക്കുന്നു: ‘അവര് (പത്രോസും യോഹന്നാനും) ചെന്നു, അവര്ക്ക് പരിശുദ്ധാത്മാവ് ലഭിക്കേണ്ടതിനു അവര്ക്കായി പ്രാര്ത്ഥിച്ചു; അന്നുവരെ അവരില് ആരുടെമേലും ആത്മാവ് വന്നിരുന്നില്ല; അവര് കര്ത്താവായ യേശുവിന്റെ നാമത്തില് സ്നാനം ഏറ്റിരുന്നതേയുള്ളൂ’ (പ്രവൃ. 8:15,16). അവര് സ്നാനമേറ്റിരുന്നെങ്കിലും ആത്മാവ് അവരുടെ മേല് വന്നിരുന്നില്ല എന്നല്ലേ ഇവിടെ കാണുന്നത്? ആകയാല് ജലസ്നാനത്തിങ്കല് ആത്മസ്നാനം ലഭിച്ചതായി സമാധാനിക്കാന് വചനം അനുവദിക്കുന്നില്ല. തന്നെയുമല്ല, ജലസ്നാനത്തില് ആത്മസ്നാനം ലഭിച്ചതായി വിചാരിക്കുന്ന പക്ഷം ഫിലിപ്പോസിന്റെ കയ്യാല് ജലസ്നാനം സ്വീകരിച്ച് ആഭിചാരകനായ ശീമോന് മാഗസും (പ്രവൃ. 8:13) ആത്മസ്നാനം പ്രാപിച്ചിരുതായി കരുതേണ്ടിയിരിക്കുന്നു. ജലസ്നാനം സ്വീകരിച്ചവര് പ്രാപിക്കേണ്ടതായ ഒരു അനുഭവമത്രെ ആത്മസ്നാനം. എന്നാല് ജലസ്നാനത്തിങ്കല് വെച്ച് അത് ലഭിച്ചുപോയി എന്ന് സമാധാനിപ്പാന് വഴി കാണുന്നില്ല.

ഒരുവന് നല്ലവണ്ണം പ്രസംഗിക്കയോ, വചനത്തെ നല്ലവണ്ണം വ്യാഖ്യാനിക്കയോ, തീക്ഷ്ണതയോടെ നല്ല വാചകത്തില് പ്രാര്ത്ഥിക്കയോ ചെയ്താല് ഈ സ്നാനം ലഭിച്ചിട്ടുള്ളതായി ചിലര് കരുതുന്നു. എന്നാല് ഇത് ആത്മസ്നാനമാകുന്നില്ല. പഴയനിയമകാലത്ത് നല്ലവണ്ണം പ്രസംഗിക്കുകയും വചനത്തെ വേണ്ടവണ്ണം വ്യാഖ്യാനിക്കുകയും ചെയ്തവരായ പ്രവാചകന്മാരും ശാസ്ത്രിമാരും ഉണ്ടണ്ടണ്ടണ്ടായിരുന്നുവല്ലോ. സകല ദൈവമക്കള്ക്കുമായി ദൈവത്താല് നിക്ഷേപിക്കപ്പെട്ടിരിക്കുന്ന ദിവ്യാനുഗ്രഹമത്രെ അത്. ആത്മാവാകുന്ന ജീവജലനദിയില് വിശ്വാസി മുഴുക്കപ്പെടുകയും അതില് നിന്ന് പാനം ചെയ്ത വിശ്വാസി ആത്മാവിനാല് നിറയപ്പെടുകയും അതിന്റെ ദിവ്യവ്യാപാരങ്ങള് അവനില് നിന്ന് നിര്ഗ്ഗമിക്കയും ചെയ്യുന്ന വിശിഷ്ടാനുഭവമാണത്. എന്നു പറഞ്ഞാല് ദൈവപൈതല് ആത്മാവെന്ന അഗ്നിയാല് ആവരണം ചെയ്യപ്പെട്ടും, അവന്റെ അന്തര്ഭാഗം ആ അത്യന്ത ശക്തിയാല് നിറയപ്പെടും, ആ അഗ്നിജ്വാലയുടെ വ്യാപാരങ്ങള് അവനില് നിന്ന് ഒഴുകിക്കൊണ്ടുമിരിക്കുന്ന അതിമഹത്തായ അനുഗ്രഹമത്രെ ആത്മസ്നാനം.


MGM Ministries-Article Source: trumpetmagazine.com/read.aspx?lang=2&id=5&mid=119 – (In 2011-2014)

(50)

LEAVE YOUR COMMENT

Your email address will not be published. Required fields are marked *

Close